चिहुल पारत हे

जनमदिन अउ सालगिरह के,
रटाटोर चिहुल पारत हे,
फलनवा ह अपन बाई संग,
भक्कम फोटू डारत हे,
लाईक अउ कमेंट घला,
चरपा ऊपर चरपा माढ़े हे,
त बिसौहा के टेस,
महंगई असन बाढ़े हे,
भेड़िया-धँसान के भरका म,
फेसन घलो लजावत हे,
संस्कार के दफड़ा ल लईका,
गाँव-गाँव म बजावत हे,
चारो मुड़ा म धंधा-रपट,
बिकास होवत हे,
भात खा-खा के पप्पू,
फोकटइहा पास होवत हे,
प्रधानमंत्री सड़क म,
पउला कस तो डबरा हे,
साउ हवय सरकार, त
फेर कोन हर लबरा हे,
कानून के जस ल जम्मो,
मनखे गोहरावत हे,
तभे तो गोल्लर मन,
हुमर-हुमर मेछरावत हे,
कौंवा कान ल लेगे,
जस बाढ़य कलियुग,
तस के भाईचारा बाढ़त हे,
जेने भुइँया जम्मो ल जाना हे
ओखरे बर झगरा माढ़त हे।